اغنية حلمة

حلمة

أنا في هالدنيا صغير حلم ثقيل وحلم كبير

بابا زوّالي وفقير نسكن في الأجبال والوّادي

نحلم نقرا بحذا الدّار لا نخاف من الذّيب الغدّار

دفيان ولا نجوع نهار وعندي صبّات كيف أنْدادي

نمشي للمكتب جيعان حفيان نعدي الودْيان

خايف من اللّيل وبردان صوتي يرعشْ لأمّي ينادي

أنا في هالدّنيا صغير حلم ثقيل وحلم كبير

بابا زوّالي وفقير نسكن في الأجبال والوّادي

قلبي يوجعني كي نشوفو بابا يخبّي دموعو وخوفو

مكسور خاطرو من ظروفو ويقول نحبّكْم يا أولادي

لكن ما بيديّا حـــــــيلة ما نقدرشي نكسي الْعيلــــــة

حاير انعشّيكم ليلـــــة سامحوني بالله يا كبــــادي

أنا في هالدّنيا صغير حلم ثقيل وحلم كبير

بابا زوّالي وفقير نسكن في الأجبال والوّادي

بردان ورجليّا حفايـَا على الخدّ دموعي بكّايــَــا

في عيوني ملْيون حكايا ونغني بالصّوت إنّادي

نحلم نعيش كيف اندادي ما نكونش محروم في بلادي

نعرف أش معناها نفرح نعرف أش معناها أعيَادي

أنا في هالدّنيا صغير حلم ثقيل وحلم كبير

بابا زوّالي وفقير نسكن في الأجبال والوّادي